TAGBILARAN CITY, Bohol, May 16 (PIA)–Gitakda na sa Oktubre 1 hangtud 5 ang pagpasaka sa certificate of candidacy (COC) sa mga gustong modagan sa 2013 midterm elections, gikan sa mga mokandidatong konsehal hangtud sa mga mokandidatong senador.
Mao kini ang gipahibalo ni Commission on Elections (Comelec) chairman Atty. Sixto Brillantes Jr. karong buntag sa usa ka panayam sa radyo.
Samtang mao gihapon ang campaign period nga gitakda sa Comelec, diin gihatagan og 90 ka adlaw nga pag-pangampanya ang mga modagan sa national elections (senators, congressmen ug partylists), samtang 45 ka adlaw usab ang ihatag sa pag-pangampanya sa mga modagan sa local elections (mayor, vice mayor, councilors, governor, vice governor, ug board members).
Sa Mayo 13, 2013 (Lunes) gitakda ang 2013 midterm elections. (PIA-Bohol/ecb)
Expert team sa DA, padung na sa China
TAGBILARAN CITY, Bohol, May 16 (PIA)–Padung na sa China ang mga eksperto gikan sa Department of Agriculture (DA) aron kumbinsihon ang Chinese quarantine officials nga export quality ug luwas sa unsa mang insekto o sakit ang saging ug uban pang prutas nga gi-export sa Pilipinas.
Pangunahan ni Bureau of Plant Industry (BPI) director Clarito Barron ang grupong padung na sa China nga mo-prisintar sa Chinese counterparts niini sa plant quaratine protocol sa Pilipinas.
Gitawtaw usab nila nga pasado sa international standard ug niagi sa saktong proseso sa produksyon ang mga produkto apil na ang washing, sorting ug packaging.
Matud pa usab ni Agriculture Secretary Proceso Alcala nga dapiton usab nila ang mga Chinese quarantine official nga mobisita sa Pilipinas partikular na sa banana plantation sa Davao aron makita nila nga niagi sa good processing practices ang mga saging nga gi-export sa ilang nasud.
Gibana-banang naa sa P1 milyon na ang giingong nawala sa mga banana exporter tungod niini.
Gitahasan na ni Alcala si Agri-business ug Marketing Assistant Service director Leandro Gazmin nga mangita og ubang market sa saging sa Middle East ug Singapore ug mag-expand usab og export operation sa Japan. (PIA-Bohol/ecb)
